<div style="background:#fff;border:#bbb dashed 1px;padding:5px"><a href="http://eo.citatepedia.ro/comments.php?id=142" style="color:#000;text-decoration:none"><div style="margin:10px 0"><strong>Venuso kaj Madono</strong></div><div style="margin:10px 0">Ideal' perdita en la nokt' de mond' ne plu estanta,<br>Mondo kun la pens' fabela kaj parol' de poezi',<br>Mi vin vidas, aŭdas, sentas, aĵo dolĉa, bela, kanta,<br>El ĉielo kun aliaj steloj, paradizoj, di'.</div><div style="margin:10px 0">Ho Venus', marmoro varma, ŝtonokulo ilumina, <br>Brako mola kiel penso de poeto-reĝ' dum jun',<br>Vi estadis la diigo de beleco la virina,<br>La virino, kiun bela vidas mi ankoraŭ nun. </div><div style="margin:10px 0">Rafael' sonĝinte iam la senliman nokton grizan, <br>Kun animo radiplena kaj kun koro je fabel,<br>Vidis vin kaj sonĝis tuje la ĝardenon paradizan,<br>Vidis vin, reĝin' ŝvebanta de l' anĝeloj el ĉiel'. </div><div style="margin:10px 0">Kaj li kreis sur la tolon bildon de Madon' Diina,<br>Kun de steloj diademo, kun mildeca virgridet',<br>En lum' blonda, kun vizaĝo de anĝelo, sed virina,<br>Ĉar virino estis ĉiam de anĝelo la portret'. </div><div style="margin:10px 0">Tiel mi, perdita en la nokt' de vivo poezia,<br>Vidis vin, virin' senkora, sen anim', sen amfajrer', <br>Kaj mi igis vin anĝelo, milda kiel tag' magia, <br>Kiam tra la viv' dezerta ridas ero da prosper'. </div><div style="margin:10px 0">Mi rigardis la vizaĝon vian, palan pro ebrio,<br>Mi rigardis viajn lipojn, bluajn pro la malvirtec',<br>Kaj mi kovris vin per blanka vualaĵ' de poezio<br>Kaj la vian palon vangan mi eknomis senkulpec'. </div><div style="margin:10px 0">Kaj mi donis al vi nimbon ĉirkaŭantan la kranion <br>Kaj la frunton de anĝelo ideala el Eden',<br>El demon' mi faris dion, el bruaĉo simfonion,<br>El via rigard' malpura, la okulon de l' maten'. </div><div style="margin:10px 0">Sed hodiaŭ la vualo malaperas! Vekiĝinta,<br>Mia frunto ekmaldormas, pro malvarm' de via kis'. <br>Mi rigardas vin, demono, kaj la am' estingiĝinta<br>Min instruas vin rigardi malestime, kun malic'! </div><div style="margin:10px 0">Vi similas baĥantinon, kiu ŝtelis kontraŭ leĝo <br>De sur frunto virgulina verdan mirton de martir',<br>Virgulino, kies koro estis sankta kiel preĝo,<br>Dum la koro baĥantina estas longa spasmdelir'. </div><div style="margin:10px 0">Kiel Rafaelo kreis bildon de Madon' Diina,<br>Kun de steloj diademo, kun mildeca virgridet',<br>Mi ekfaris diinaĵon el pala estaĵ', virina,<br>Kun malvarma sent' kaj koro plena de venen' kaj ted'. </div><div style="margin:10px 0">Ĉu vi ploras, knabineto? Per rigardo elokventa<br>Vi denove povas ŝiri mian koron de vampir'.<br>Mi genue falas, kara, kaj mi petas, korpripenta, <br>Dum mi kisas viajn manojn, la pardonon pro la dir'. </div><div style="margin:10px 0">Ne plu! ... La kulpigo estis, kara, nur deklamo,<br>Kruelega kaj maljusta, sen apogo, nur erar'. <br>Eĉ demono se vi estus, vi sanktiĝas per la amo,<br>Kaj adoras mi demonon tiun ĉi, kun blondharar'.</div><div style="margin:10px 0"><br /></a><br />poem by <a href="http://eo.citatepedia.ro/by.php?a=Mihai+Eminescu">Mihai Eminescu</a>, translated by Petre Firu<div class=q> <img src="https://www.citatepedia.ro/g/32share.png" style="float:left" alt="Share"> <script type="text/javascript" src="//s7.addthis.com/js/300/addthis_widget.js#pubid=citatepedia" async="async"></script><div style="display:inline-block" class="addthis_sharing_toolbox" data-url="http://eo.citatepedia.ro/comments.php?id=142" data-title="Venuso kaj Madono de Mihai Eminescu" data-description="Ideal' perdita en la nokt' de mond' ne plu estanta,/Mondo kun la pens' fabela kaj parol' de poezi',/Mi vin vidas, aŭdas, sentas, aĵo dolĉa, bela, kanta,/El ĉielo kun aliaj steloj, paradizoj, di'./Ho Venus', marmoro varma, ŝtonokulo ilumina, /..."></div> </div> </div>

solid border dashed border dotted border double border groove border ridge border inset border outset border no border blue green red purple cyan gold silver black